Viache en o tiempo

 

 

modernismo textoZaragoza en o sieglo XX

 

Zaragoza ye una ciudat que tien más de 2000 anyos…ixo lo conoixe tot o mundo…Por iste puesto han pasau bellas civilizacions y han feito que ista ciudat tienga…pese a un historia plena de batallas,esferrasy furtos, un important patrimonio.

A yo, una d’as epocas que más goi me fa ye o sieglo XX, más que más os anyos antis d’a Primera Guerra Mundial,os anyos d’o Modernismo. Me cuaca  a-saber-lo l’arquitectura y más que más iste estilo, que forma parte de una corrién, de una nueva ruxiada artistica desembolicada entre os sieglos XIX y XX, una epoca conoixida tamién como Belle Époque, un arte nuevo, choven, libre y moderno que estricalló os vinclos con o viello, con lo academico, encara que a vegadas meteba cosas d’ista corrién. Yera una nueva estetica que teneba os suyos alazetz en a Naturaleza, que yera a suya inspiración, pero que tamién feba servir as novedatz traitas por a Revolución Industrial, como o fierro y o beire.

Istas ideyas s’alazetoron en as ideyas de John Ruskin y William Morris…que quereban democratizar a belleza y socializar l’arte y que dica o obcheto mas chicorrón y cutiano tenese valor estetico y estiese amán de totz, encara sin fer servir a producción masiva…continando con o carácter artesanal. O modernismo plegó dende as artes mayores (arquitectura, escultura y pintura) dica as minors, as artes decorativas, graficas y mobiliario…domestico y urbano.

Como hemos dito, o modernismo s’alazeta en a Naturaleza y la fa servir tanto en a estructura como en o acotracio. Tamién fa servir a ringla curva y l’asimetria y fa un mezclayo de materials como puede estar o fierro, as recholas, o beire, os ladriellos, o cantal y as vidrieras y a vegadas se meten cosas d’atros estilos como o estilo hitoricista (o “neos”…neogotico…neomudechar…) u o estilo eclectico (que ya de por si…ye un mezclayo).

O Modernismo en Zaragoza estió un estilo poco bamboso, a on se pueden veyer influyencias de mayestros foraneos como puede estar Domenech i Montaner. Más que más se fació sevir en edificios privatos y villas y s’intresó por o acotracio en as fronteras d’os edificios.

Como eixemplos d’arquitectura publica pueden estar o Mercato Central, de Felix Navarro y o repoliu kiosko d’a musica, de José y Manuel Martínez de Ubago Lizárraga, hue en o Parque Gran Jose Antonio Labordeta.

Muitos saben que si quieren veyer buenos eixemplos d’arquitectura modernista, s’han de amanar a o Paseyo de Sagasta o puesto que eslixió a burguesia d’a ciudat ta vivir…difuera d’a ciudat tradicional, un puesto que teneba un urbanismo moderno e higienico a on se podaban construyir nuevos, amplos y luxosos edificos. Bi ha atros puestos a on se puede veyer modernismo, pero talmén Paseyo Sagasta ye o mas famoso.

Antis mas…bi’n heba muitos más, pero o desarrollismo d’os anyos 60-70 fació que muitos s’esboldregasen.

A yo m’aganaría charrar d’atros que no sigan os tipicos de Sagasta o Carrera Alifonso…yo quereba charrar d’as villas, chalets u hotels que encara quedan por a ciudat…no quedan guaires…8 alto u baixo.

 

Palacio de Larrinaga

 larrinaga

 Uno d’istos edificios que mas goi me fa ye o Palacio de Larrinaga. Estió construyito por Félix Navarro (encara que no lo remató el) por encargo d’o naviero vasco Manuel Larrinaga. Iste palacio yera o present por o casorio d’o suyo fillo Miguel con Asunción Clavero, una choven naixida de Albalate del Arzobispo. Se diz que Miguel, que en ixas envueltas estudiaba en Zaragoza, se trobó con Asunción a la salida de misa en o Pilar y s’enamoró d’ella y dimpués de un tiempo…rematoron chuntos y marchoron a vivir a Liverpool, sede de a compañía naviera. Cuasi no lo facioron servir, i estioron tres vegadas, quan prencipioron os treballos, quan s’engueró o edificio y atra vegadas más. A parella teneba  ideya de vivir aquí quan se chubilaran, ya que teneban atrás casas en Malaga y San Sebastian para pasar astí os estius, pero quereban rematar os suyos diyas aquí. Encara que o palacio en a primera decada d’o sieglo era ya rematau, yera vuedo y al morir-se Asunción en 1930, Miguel no quiso saber cosa d’o edificio y lo vendió a un interpresa de puyadors, Giesa, fendolo servir como seo, pero dimpués lo vendieron atra vegada, en iste caso a os Marianistas que lo facioron servir como colechio dica que construyoron atro colechio dezaga y asinas IberCaja lo mercó y esbielló.

Ye un eixemplo d’arquitectura eclectica, con aspectos historicistas neorrenacentistas y atros modernistas como puede estar o acotracio vegetal, l’empleo d’o fierro, recholas, cantal, ladriellos y vidrieras. Apareixen continas referencias a o mar y a comercio maritimo, o treballo d’os Larrinaga.

Iste edificio se troba en a carrera hue conoixida como Miguel Servet, cuasi a la fin, cuasi difuera d’a ciudat. Quan lo facieron solo bi heba campos en a redolada.

Hue se fan visitas guidadas a o palacio para asinas poder conoixer ista xoya d’a nuestra ciudat

 

Paseyo Ruiseñores



Talmén menos conoixiu que Paseyo Sagasta, encara que siga a canto, ye o Paseyo Ruisenyores. Iste paseyo que prácticamente estió continuación de Paseyo Sagasta, también estió un puesto a on a burguesía zaragozana fació as suyas casas.

Tuvo un desembolique mas tardano, pero no pior y asinas i facionron dos xoyas que han puesto plegar…una mica cambeadas…dica o nuestros diyas. Bi ha atros eixemplos buenos de arquitectura en a redolada como casas feitas por Regino Borobio u o edificio d’a viella Fabrica de Farinas La Imperial, pero a resta de casas, como atrás muitas, s’esboldrogoron a favor d’o progreso urbanistico.

Una d’as dos xoyas que i podemos veyer ye Villa Alta, de la familia Ostalé.

Parexie (no bi ha documentación precisa) que estió construyito iste hotel entre 1912-1915. Yera un edificio exento con amplo chardin. O suyo nombre, “Villa Alta” ye por as vistas que dende a casa se teneba d’os hortals zaragozanos.

Yera un eixemplo d’arquitectura hibrida,fendo un mezclayo de volúmenes mesos de traza geometrica y detalles d’acotracio de influyencia d’a Sezession vienesa, con una mica d’estilo eclectico nortenyo con un chuego de teyaus y con chapitel en o torreón fendo cantonada continando con a moda que se podeba veyer en a casas d’os indianos en a Costa Cantabrica y antimás tamién tiene detalles modernistas.

Ista villa estió fruito d’aspeculación urbanistica y estió anyos vueda,abandonado y expoliada dica 1994 quan s’esboldrogó,encara que bells anyos dimpues por orden municipal se refació. Encara queda orichinal a dentrada y a cleta de fierro.

A o canto de Villa Alta bi ha atra casa, l’atra xoya d’o Paseyo que si ha puesto continar dica nuestros diyas ye porque iste edificio lo facioron servir como colechio. Antis más se deciba “Villa Rosita” y yera propiedat de Raimundo Balet. Se remató en 1919. Dimpués de casa familiar,estió colechio, o Colechio de Santo Tomas de Aquino. Encara que o edificio ye estau muit transformau, se puede veyer o torreón modernista en cantonada y cupulau con trotz de ceramica fendo una mena de “trencadis” (tipico d’arquitectos como Gaudí y Jujol en ixas envueltas) y en l’atro canto tien un mirallo feito de fierro y beire.

Hue lo fan servir atra vegada como vivienda.

 

 

 

Casa Solans

 casa solans

 Ista casa cuasi de seguras que la conoisetz. Cuasi totz os molimentos más importants son a dreita d’o Ebro, pero en o vico d’o Rabal o Arrabal tamién bi’n ha. Tenemos a Gara d’o Norte, a Fabrica de Galletas Patria  o Azucarea d’o Rabal o Molin de San Lazaro e ista casa.

Estió una villa construyita por o industrial marinero Juan Solans y disenyata por l’arquitecto Miguel Angel Navarro, debant d’a fabrica de Solans.

Ye un buen eixemplo d’arquitecura eclectica privata con ornamentación modernista e historicista.

Destaca muito as recholas policromadas que cubren a frontera, lo que fació que mientres muitos anyos estió conoixida popularmente como a “Casa d’as Recholas”.

Juan Solans nunca no la desfrutó, ya que se murió antis de que estiese rematada, por lo que la fació servir a suya viuda y o suyo sobrin dica que ella se muriese en 1965. A villa se vendió en 1972.

A casa remató vueda e ixublidada  mientres mas de 20 anyos, mientres yera fruito d’o vandalismo y d’a degradación y cuasi remata esboldregada quan estió declarata en esferra en 1995, pero o 19 de Febrero de 2002 estió declarata BIC (Bien de Intrés Cultural) lo que la salvó. Allora prencipioron os treballos d’esbielladura de traza cuasi artesanal, treballos que remataron en 2006.

Una atra vegada,tipico d’iste estilo fa servir esferents materials fendo mezclayo, con fronteras de ladriellos cubierta de recholas policromadas, aleros de fusta y cantal y detalles y zerrullos de forja de fierro.

A casa tien 3 pisos más sotarranyo. O cobaixo y a planta prencipal fan a vivienda privata y o cabalto lo feba servir o servicio.

Dende que rematoron os treballos d’esbielladura dica 2015 a ONU feba servir a villa como seo d’a Oficina de la Decada de l’Augua.

Agora ye de propiedat municipal y se i fan visitas guidadas a sobén.

 

 

Paseyo Pamplona, 3

 

paseo pamplona

 Nos trobamos en Paseyo Pamplona en o mesmo centro d’a cuidat, a o canto d’o Paraninfo, a on sobrevive un chicorrón hotel en el que poca chen para cuenta, porque cuasi ye amagau entre edificios grandizos.

Dende que yera un nino me ha feito goi ista casa, encara en emplego, porque dengún pareixeba veyer-la, como si estiese invisible y a yo me pareixeba quemisie yo…magica.

En 1899 l’arquitecto madrileño Francisco Gutiérrez proyectaba una casa para Jose María Rodríguez como un hotel de dos plantas en estilo eclectico con acotrazio y forja modernista.

En as primeras decadas d’o sieglo XX se facioron bellos treballos, o mas important en 1916 quan l’arquitecto Manuel Martínez de Ubago Lizarra, meteba una planta más y bellas tarrazas a on metió unas repolidas rexas de fierro de traza modernista con trazas florals,vechetals y “coup de fouet” asinas como os mirallos de fierro y beire que caracterizan o edificio.

En os anyos 20’ se fació atra planta mas. En total, tenemos un edificio exento de 4 plantas, feito en ladriello,cantal,fierro y beire.

O resultau da una imachen de lixereza y transparencia a o carácter eclectico d’o edificio.

Ye o zaguer edifico d’iste estilo d’o Paseyo, a on se pueden veyer atros buenos eixemplos d’arquitectura,como una casa feita por Regino Borobio y no cal ixublidar-se que en a carrera Almagro,4, a 5 menutos d’iste edificio modernista se troba o zaguer Café modernista de Zaragoza, Café de Levante.

Ye verdad que Paseyo Pamplona amenista ya una esbielladura.

 

 

 Maestro Estremiana,1

 

     

 A o fundo d’o Paseyo Sagasta se troba o Parque Pignatelli a on se fan bells esbares, a dreita, nos endrezamos a o Paseyo Ruisenyores a on i somos ya estaus y a cucha puyamos por o Paseyo Cuéllar. A o fundo d’iste paseyo, chusto antis de plegar a o Canal Imperial y a Ilesia de San Antonio, trobamos atra villa modernista, que cuasi no se veye, debiu a o suyo chardin pleno d’arbols y plantas.

Se creye que lo fació l’arquitecto Luis de La Figuera en a primera decada d’o sieglo XX como casa unifamiliar. Entre 1989 y 1990 s’esbellió y agora ye un edificio de vivendas, pero encara tien os elementos mas caracteristicos y d’intrés.

Tien una traza y volumetria simpla, de plano rectangular.

Se fació con fronteras de ladriello zaboyau y carácter eclectico, con acotracio sencillo en ringlas horizontals y verticals, con finestras adinteladas en traza simetrica, dando a o conchunto un gran equlibrio. En o cabaixo se fa servir o cantal como alazet desaparato en filadas y vanos remataus en arco “escarzano”.

Important ye o acotracio y ornamentación en traza vechetal y floral que se meten en vanos y finestras asinas como en a cleta d’o chardin con intresants rexas de fierro a on se desembolica a tipica ornamentación “coup de fouet”. Importants tamién os pilars de cantal d’sta cleta remataus en capitel floral.

 

Paseyo Sagasta

 Ta rematar con iste articlo de villas y chalets modernistas cal amanar-se a Paseyo de Sagasta, talmén o puesto mas famoso si charramos de eclecticismo y modernismo, porque ye verdad que en ista carrera y as carreras d’a redolada bi ha una buen ripa de edificios d’sita traza, pero a yo en iste articlo me intresa as villas y os chalets exentos y en ista carrera encara bi’n ha dos…pero bi’n heba un fascal, porque en un canto d’sta carrera se construyeron edificios de viviendas y en l’atro chalets y hoteles y d’istos encara bi’n ha dos. Son a Casa Mantecón, conocixida hue como o Colechio Mayor de la Anunciata y a Clinica d’o Doctor Lozano.

A Casa Mantecón se fa como casa familiar de Miguel Mantecón prochectada en 1925 por l’arquitecto donostiarra Luis Elizalde a imachen d’as casa d’a costa vasca feitas por Smith y Rucabado para a burguesia industrial que i viviba u veraneaba. Ye un eixemplo insolito en Zaragoza, pues as caracteristicas arquitectonicas no son as tipicas d’a ciudat, pero o alero que remata o edificio, feito en fusta, si que en ye. O edificio se define más que más por o torreón que fa cantonada.

Ye un edificio a on se fa un mezclayo de caracteristicas rechionalistas vasco-aragonesas, historicistas y modernistas.

En os anyos 50’ se fació un alinie para fer en ista casa un colechio universitario femenino y encara que se fació una gran enampladura dezaga d’a casa orichinal, mantiene o carácter de viella vivienda burguesa.

Amán d’o edificio d’a Confederación Hidrografica d’o Ebro (CHE) tenemos l’atro eixemplo de villa o chalet modernista d’o Paseyo, a Clinica d’o Doctor Lozano.

Estió prochectada en 1903 por l’arquitecto Félix Navarro para que estiese a clinica y casa familiar d’o doctor Ricardo Lozano Monzón. A casa orichinal se transformó con nuevas enampladuras en os anyos vinients, más que más con a enampladura feita por Manuel del Busto en 1916 que estricalló a simetria d’a frontera principal, fendo un nuevo cuerpo de dos plantas con mirallos remataus con recholaus que dan a o Paseyo Sagasta y a Carrera Lagasca, a on se troba a dentrada d’a casa, en un porche con cuatro pilars rematau en balaustrada que se fa servir como mirallo en a planta principal. A segunda planta ya con finestras, se remata con atro recholau.

En a parti de dezaga d’o edificio, en a segunda planta, se troban atros dos mirallos semicirculars, feitos en fusta y beire, de traza modernista, istos puestos son a quirfán y a capiella d’a clinica. En ista parti de dezaga se troba tamién o chardin.

Importants son atra vegada as rexas y os detalles de fierro de mirallos y cletas con acotrazio vechetal y floral modernista.

 

Bueno…y asinas remato iste articlo, en atro charraré d’atros edificios modernistas y d’atros estilos pues l’arquitectura me cuaca muitismo y tamién m’aganaria charran d’os edificios que ya no existen y que s’esboldrogoron, que en son muitos!

 cenefa modernista

FIN

Chipster Birabolón

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s